फाल्गुन : शुक्ल सप्तमी शिबिकोत्सव. वर्धापन दिना निमित्त श्री वेताळ देवाची स्वारी पालखीत बसून ज्या जागी श्री वेताळ देवाची जुनी लाकडी मूर्ती विसर्जन करून त्यावर पार किंवा पेड बांधलेले आहे त्या जागेंवरून जाऊन येतें; वद्य एकादशी ते अमावस्या पांच दिवशी शिमगा उत्सव. देवस्थानांत जो रात्रौ शिबिकोत्सव होत असतो त्या वेळीं पालखी रात्रौ अंदाजे 8 वाजतां संचार मिरवणुकीस प्रारंभ होत असतो. आणि त्या संचारांत वाटेंत ठरलेल्या ठिकाणीं आठ पेणीं (मुक्काम) होतात. चैत्र महिन्यांत शुक्ल अष्टमी, नवमी श्रीरामजन्मोत्सव, दशमी समाराधना. हे तीन दिवस, ज्येष्ठ महिन्यांत करावयाची ज्येष्ठ पूजा आणि कार्तिक महिन्यांत पौर्णिमा रोजी आंवळी भोजन, महारुद्र समाराधनासहित, आणि देवकार्य ही देवकृत्यें या देवस्थानचे कुळावी महाजन श्री. येसू प्रभू शिनारी मुक्काम रायबंदर हे आपल्या हयाती पर्यंत नियमितपणे प्रतिवर्षी साजरा करीत आले आणि त्यांच्या पश्चात्‌ त्यांचेच वंशज वारसदार ते उत्सव प्रतिवर्षी नियमितपणें मोठ्या उत्साहानें साजरे करतात.